Un proxecto de cooperación mellorará o sistema de abastecemento de auga en Guinea Bissau

DUVI | Na cidade de Bafatá, en Guinea Bissau (África), está o barrio de Ponte Nova. Nun país onde case o 92% dos seus cidadáns vive na pobreza extrema, entre as dificultades que afrontan os case 4000 habitantes deste barrio está o acceso a auga saneada, feito que ten un impacto directo na súa calidade de vida e saúde. Co obxectivo de contribuír a mudar esta situación, un proxecto posto en marcha por un equipo de investigación da Facultade de Ciencias do campus de Ourense traballa na mellora do sistema de abastecemento de auga para consumo humano desta poboación. A iniciativa naceu do compromiso dun egresado da Universidade de Vigo, Mamadú Seide Bá, co seu país de orixe.