A UCC+i despide febreiro con máis de medio cento de charlas en 40 centros educativos galegos para celebrar o Día da Muller e da Nena na Ciencia

Aída María Diez, Verónica Poza e Silvia Escudero no Colexio Montesol
| Noticias

Con motivo da conmemoración do Día da Muller e da Nena na Ciencia o pasado 11 de febreiro, a Universidade de Vigo puxo en marcha un amplo programa de actividades entre as que se inclúen as charlas científicas en centros educativos de toda Galicia. Organizadas dende a Unidade de Cultura Científica dentro do marco do Plan de Ciencia de Ida e Volta, estas actividades -que contan co financiamento da Fundación Española para la Ciencia y Tecnología (FECYT) do Ministerio de Ciencia, Innovación e Universidades- teñen como obxectivo achegar a universidade ao alumnado de colexios e institutos, así como fomentar as vocacións científicas, especialmente entre as nenas.

Seguindo a estela de edición previas, este ano a UCC+i puxo en marcha 60 charlas e obradoiros científicos en 40 centros escolares das catro provincias galegas. En total foron 42 as investigadoras da UVigo que se achegaron ata os 40 centros que acolleron as actividades do Día Mundial da Muller e da Nena na Ciencia. Dende a UCC+i amósanse especialmente satisfeitos co alcance da actividade, que estiman en preto de 3.000 persoas.

“Aproximadamente a metade das charlas chegaron a alumnado de primaria, mentres que a outra metade se repartiu entre secundaria e público adulto de FP ou centros EPA” sinalan dende a Unidade. “Segundo as enquisas de valoración das charlas 11F, o 100 % dos centros afirman que estarían dispostos a participar en máis actividades deste tipo e todos eles consideran fundamentais estas charlas para a promoción de vocacións STEM entre as nenas”, engaden.

Das charlas impartidas, 47 tiveron lugar na provincia de Pontevedra, mentres que as restantes se repartiron entre Ourense (5), Lugo (4) e A Coruña (4). En canto a cidades, a que acolleu un maior número de charlas científicas foi Vigo, con 15; seguida de Pontevedra, con 6; Ourense, con 4 e Lugo, con 3. O restante repartíronse entre vilas e zonas rurais das catro provincias tales como Chapela, A Guarda, Gondomar, Pazos de Borbén, Nigrán, Moaña, Ponteareas, Salcedo, Carballo, Boborás ou Monforte de Lemos, entre outros.

“Trátase de actividades que historicamente gozan de gran popularidade entre a comunidade educativa, pero tamén entre as propias investigadoras da UVigo” subliñan dende a UCC+i. “Isto tradúcese nun amplo catálogo de actividades divulgativas atractivas e inspiradoras para as novas xeracións de científicas e científicos”, manifestan dende a UCC+i.

Nas súas valoracións, case o 90 % das investigadoras participantes indica que repetiría a experiencia, destacando especialmente a participación do alumnado e a boa acollida nos centros escolares. Así mesmo, moitas delas destacan nestas enquisas a necesidade de achegarse a colexios e institutos en zonas rurais e tamén a importancia de proporcionar referentes próximos e reais para a rapazada.

A UCC+i agradece tanto aos centros participantes como ás investigadoras a súa “xenerosa implicación” nas charlas 11F, e emprázaos a continuar participando nesta iniciativa para que cada vez máis nenas queiran ser científicas.