Para conmemorar o Día Mundial da Saúde, que se celebra cada 7 de abril, dende a Unidade de Cultura Científica e da Innovación da Universidade de Vigo, xunto coa colaboración da Fundación Española para la Ciencia y Tecnología (FECYT) del Ministerio de Ciencia, Innovación y Universidades, queremos promover a sensibilización sobre a importancia de coidar os nosos corazóns e o compromiso social en torno a prevención deste tipo de patoloxías con estas dúas actividades:
SERIE DE PODCAST
Dende o 8 de abril, publicaranse periodicamente os diferentes episodios dunha serie de podcast que abordará temas sobre saúde cardiovascular. Estarán protagonizados por expertos de distintas áreas relacionadas coa diagnose, seguimento de patoloxías cardiovasculares, así como a prevención e a promoción de hábitos saudables entre a poboación galega, onde a prevalencia e mortalidade deste tipo de enfermidades é moi alta.
Día Mundial da Saúde | Cap. I: Os datos e a saúde cardiovascular
Día Mundial da Saúde | Cap. II: Sinais do corazón
Día Mundial da Saúde | Cap. III: Xenética e saúde
Neste terceiro capítulo, acompáñanos Diana Valverde, que é a investigadora principal no laboratorio de enfermidades raras no CINBIO, da Universidade de Vigo e, entre as investigacións que dirixe moitas delas están relacionadas coas cardiopatías. Con ela, aprenderemos as vantaxes dos “modelos celulares” para o estudo de enfermidades, que as mitocondrias teñen un punto de vista, a importancia que ten o estudo de casos singulares para a mellora de procesos de enfermidades máis comúns e sobre todo que do difícil que resulta aprender a perseguir soños.
Día Mundial da Saúde | Cap. IV: Dálle ritmo! (parte I)
Unha conversa para afondar na relación da saúde cardiovascular co deporte e coa alimentación cos expertos da Universidade de Vigo: Federico Mallo Ferrer, Javier Prieto Troncoso e Hugo Ogando Berea. Aprender a darlle ritmo ao corazón, a modernización das teorías ao redor do exercicio ou os hábitos desexables para cada idade, forman parte desta agradable xornada!
Agradecementos ao departamento de Bioloxía e, en xeral, á toda a comunidade educativa do IES Mendiño.
Día Mundial da Saúde | Cap. V: Dálle ritmo! (parte II)
Segunda parte da sesión no IES Mendiño cos investigadores: Federico Mallo Ferrer, Javier Prieto Troncoso e Hugo Ogando Berea. Ejercicio físico, alimentación e descanso son os tres piares sobre os que construír unha vida saudable. Unha charla longa que dá conta do interese que espertou e as diversas cuestións abordadas, para gozar e coidar!
Agradecementos ao departamento de Bioloxía e, en xeral, á toda a comunidade educativa do IES Mendiño.
CHARLAS EN CENTROS EDUCATIVOS
Impartidas por investigadores da Facultade de Ciencias da Educación e do Deporte da UVigo en centros de primaria e secundaria co obxectivo de concienciar ao alumnado sobre a importancia de previr problemas de saúde ocasionados polo sedentarismo e os hábitos alimentarios inadecuados.
IES Mendiño | Dálle Ritmo!
Co gallo da gravación do vídeo-pódcast, a UCC+i e o xornalista Gabriel Fuentes, en colaboración co IES Mendiño elaboraron unha serie de preguntas para desenvolver a entrevista co persoal investigador da Universidade de Vigo. Os invitados deste capítulo foron: Federico Mallo Ferrer (catedrático e director do Laboratorio de Endocrinoloxía – LabEndo), Javier Prieto Troncoso (Investigador da UVigo en Endocrinoloxía e Fisioloxía do Exercicio) e Hugo Ogando Berea (Investigador da UVigo en Endocrinoloxía e Fisioloxía do Exercicio).
A conversa foi moi dinámica e interesante e contou coa participación activa do alumnado do centro. O resultado será publicado en breve nas redes da UCC+i.
Moitas grazas á comunidade educativa do IES Mendiño pola súa colaboración e interese.