DUVI | Os leitos de pastos mariños son ecosistemas ecoloxicamente fundamentais en augas pouco profundas, xa que desempeñan un papel importante en todos os procesos costeiros, converténdoos en fundamentais para manter poboacións de especies comercialmente importantes e desempeñando un papel clave na sostibilidade da pesca a pequena escala. Non obstante, non só están experimentando un rápido declive, cunha perda de arredor do 7% da súa distribución global cada ano, senón que tamén adoitan quedar fóra da axenda de conservación de gobernos e organizacións internacionais. Agora a través do proxecto ZEUS, financiado polo Ministerio de Ciencia, Innovación e Universidades cun orzamento 211.750€, persoal investigador do grupo de Ecoloxía Costeira pertencente ao Centro de Investigación Mariña da Universidade de Vigo avaliará a importancia das pradarías de Zostera noltei como área de cría e hábitats de xuvenís e adultos reprodutores de tres especies de ameixa comercial (babosa, xapónica e fina) e como mitigadoras das vagas de calor e ás flutuacións bruscas da salinidade. “Queremos poñer en valor tamén a importancia de conservar estas pradarías, que a miúdo entran en conflito cos intereses do marisqueo, xa que unha das prácticas habituais é a eliminación da Zostera nestas zonas”, salientan Celia Olabarria e Elsa Vázquez, investigadoras principais do proxecto.
Investigadoras viguesas lideran un proxecto que estuda se as pradarías Zostera noltei melloran a cría de tres especies de ameixa comercial
