DUVI | Por un futuro da ciencia e a tecnoloxía paritario, no que as mulleres atopen o seu lugar e poidan poñer á disposición da sociedade o seu talento, o 50% de todo o talento do planeta. Con esta finalidade celébrase cada 11 de febreiro en todo o mundo o Día da muller e a nena na ciencia, unha efeméride á que a Universidade de Vigo se une con múltiples iniciativas, entre elas, Elas Fan CienTec, unha posta que este xoves trouxo ao campus máis de 200 mozas de institutos da contorna para coñecer o traballo que realizan científicas e tecnólogas da Universidade de Vigo. A finalidade é espertar entre as nenas e mozas o interese pola ciencia e a tecnoloxía e xerar vocacións de futuro para así reverter a escasa presenza de mulleres nas carreiras STEM. Por exemplo, os datos do curso pasado amosan que aínda que as mulleres eran o 52% do total do alumnado da UVigo, nas carreiras do eido científico e tecnolóxico esta porcentaxe apenas supera o 30%; nalgunhas carreiras non chegan ao 10%.