DUVI | O programa Inspira STEAM para o fomento das vocacións científicas e tecnolóxicas impulsado pola Universidade de Vigo e a Deputación de Pontevedra segue sumando éxitos. Este venres clausurouse a súa quinta edición, a máis numerosa ata o momento, que chegou durante o curso 2022/2023 a 632 estudantes de primaria e ESO de 14 centros da provincia de Pontevedra e contou coa participación de 46 mentoras e mentores. Deste xeito, a iniciativa que naceu na Universidade de Deusto en 2016 e comezou a desenvolverse en Galicia en 2018, cumpre o seu primeiro lustro superando xa os 2000 estudantes mentorizados.